ಹಾಯ್ಕು ಹಗರಣ ~ 8

ತಣ್ಣನೆಯ ಬೆಂಕಿ ಸುಡುವುದಿಲ್ಲ
ಇಂಚಿಂಚೆ ಕೊಲ್ಲುತ್ತದೆ..
ಇರಿದ ರಕ್ತ ಸೋರದ ಹಾಗೆ!

***

ಗಾಣದಲ್ಲಿ ಒಣ ಹಾಕಿದ್ದ ಎಳ್ಳು
ಸಿಡಿದು
ಮೊಳೆತು ಹೂ ಬಿಟ್ಟಿತು.

 

ಸಣ್ಣ ಸೂಜಿಯ ಶಬ್ದ
ಇರಿಯುತ್ತಿದೆ
ಬಯಲು ತಣ್ಣನೆ ಮಲಗಿದೆ.

***

ಚಂದ್ರನಲ್ಲಿ ಕಲೆ
ಹುಡುಕುವವರ ಕಣ್ಣಿಗೆ
ಬೆಳದಿಂಗಳು
ಎಂದೂ ಕಂಡಿರುವುದೇ ಇಲ್ಲ!

ಖಾಲಿ ಸೀಸದ ಒಳಗೆ
ಮಿಂಚುಳ ಬಂಧಿಯಾಗಿದೆ.
ಇದು ಗ್ರಹಣ ಕಾಲ!

***

ಒಲುಮೆ
ಮೊಗೆದು ಕುಡಿದಷ್ಟೂ
ತುಂಬದ ಒಡಲ
ಖಾಲಿ ಸೀಸೆಯ ಗದ್ದಲ.

***

ಈ ರಾತ್ರಿಯೊಂಬೊ ಬೆತ್ತಲು
ಮೈಯೊಳಗೆ
ಎಣಿಸದಷ್ಟು ಪರಚು ಗಾಯಗಳಿವೆ! 

***

ಹಕ್ಕಿ ಹಾಡುವುದ ಕೇಳಿಸಿಕೊಂಡ
ಕವಿ, ನಕಲು ಮಾಡಿ
ಕವಿತೆ ಬರೆದುಕೊಂಡ! 

ಹಾಯ್ಕು ಹಗರಣ

ಉಸಿರೆಂಬುದು
ಬೆಳಕಿರದ 
ಬೆಂಕಿ! ~
 ***

ಉಸಿರು ~
ತಡೆಯಲಾರದ ತಾಪ
ಬೆಳಕಿರದ ಬೆಂಕಿಯ
ಡ್ರಾಗನ್

***
ಉಸಿರಿನ
ಆಳದಲ್ಲಿ
ಡ್ರಾಗನ್ ಹಾರುತ್ತಿದೆ!
 

ಹಾಯ್ಕು ಹಗರಣ

ತೆಂಗಿನ ಮರದ
ತುದಿಯಲೊಂದು
ಹುಣ್ಣಿಮೆಯ ಹಣ್ಣು. 

***

ಬೆಳಕಿಗಿಂತಲೂ
ಕತ್ತಲೇ ಉರಿಯುತ್ತದೆ
ತಣ್ಣಗೆ!

***

ಕತ್ತಲೆಂಬುದು
ಸೃಷ್ಟಿ ಎಳೆದುಕೊಂಡ
ಒಂದು ತೆರೆ. ~ 

ಹಾಯ್ಕು ಹಗರಣ ; 3

ನದಿಗೆ
ಸೋರುವ ನೆಗಡಿ ;
ಅಧಿಕಮಾಸದ ಮಳೆಗಾಲ

ಹಾಯ್ಕು ಹಗರಣ ; 2

ಕ್ಷಿತಿಜೆಯ ಅಂಗಳವೆಲ್ಲಾ
ರಕ್ತ ತೊಳೆದ ನೀರು
ಸೂರ್ಯನ ಕಗ್ಗೊಲೆ!

ಹಾಯ್ಕು ಹಗರಣ : 1

ಹುಣ್ಣಿಮೆಯ ರಾತ್ರಿ
ಇದೇನು ಕೊಲೆ, ಹಗರಣ.
ಕೊಳದಲ್ಲಿ ತೇಲುತಿಹದು
ಚಂದಿರನ ಹೆಣ!