ಶರತ್ಕಾಲದ ರಾತ್ರಿಗಳು

ಈ ಶರತ್ಕಾಲದ ರಾತ್ರಿಗಳು
ಉದ್ದುದ್ದ ಎಳೆದಂತೆ
ಬಹುದೀರ್ಘ ಬೆಳಗಿನವರೆಗೆ
ಮೈತುಂಬ ಹಾಲು ಸುರಿದುಕೊಂಡ
ಚಂದಿರ, ಕೊರೆವ ಚಳಿಗಾಳಿ,
ಚಂಡಿ ಹಿಡಿದಂತೆ ಸುರಿವ ಮಳೆ

ನನ್ನ ನೀರ ನೀರವ ಮಂಡಲದಲಿ
ಅವಳು ಹ್ಞೂ ಕಾರಾಕ್ಷರದಲಿ
ಕಟ್ಟಿ ಹಾಕಿದ್ದಾಳೆ... ಕಟುಕಿ
ದುಂಬಿಯ ಬಂಧನ ಲೋಕನ್ಯಾಯವಲ್ಲ!

ಚುಕ್ಕಿಗಳು 'ಚ್ಚ್ ಚ್ಚ್' ಲೊಚಗುಟ್ಟುತ್ತವೆ.
ಕಪೌಂಡಿನಾಚೆ ಹೂಗಳು ಮೂಸಿನಗುತ್ತವೆ.
ಜೀರುಂಡೆಯ ಜೊಂಪು, ಕಪ್ಪೆಯ ವಟರಿನ ಮಧ್ಯೆ
ಒಂದೇ ಜಪ
ಒಂದೇ ತಪ
ಬರಲಿ ಸಾಕೊಂದೇ ಸಿಡಿಲು
ಆಮೇಲೆ ನನ್ನದು ಮುತ್ತಿನ ಮಳೆ.

ಇಂದಿರ ಕೇಳಿಸಿಕೊಂಡನೆನೋ
ಹೊರಗೆ ಮಿಂಚುತ್ತಿದೆ,
ಒಳಗೆ ಹರಿಯುತ್ತಿದೆ! ~ ಆರ್.ಪಿ.