ಬೆತ್ತಲ ಮೆಟ್ಟಿಲುಗಳು

1.      ಸಾವಿರ ಸಾವಿರ ಬೆತ್ತಲು
ಬಯಲಾದರು
ಒಲವಿನ ದಾರಿಗೆ ಕಾಣದಷ್ಟು
ಬೆತ್ತಲ ಮೆಟ್ಟಿಲುಗಳು

ನಾ ಕಳಚಿಕೊಳ್ಳುತ್ತಾ
ಮೆಟ್ಟಿಲು ಹತ್ತುತ್ತಿರುವೆ
ಪ್ರತಿ ಹೆಜ್ಜೆಗೂ ನನ್ನದೇ
ಪ್ರಾಣ ಸಿಕ್ಕಿದಂತೆ
ಎದೆಯೊಳಗೊಂದು ಸಣ್ಣ ಚೀರು

ಶೃಂಗದಲ್ಲಿ ಮತ್ತದೇ ನಿನ್ನ ಶೃಂಖಲೆ
ಎಲ್ಲೂ ನೀನೇ ಕಾಣುವ ಭ್ರಾಂತು
ಮಾತು ಮೌನಗಳ ನಡುವೆ ಸಿಕ್ಕೊಂಡ
ನಾನು
ಹುಡುಕುತ್ತಿದ್ದೇನೆ ನನ್ನ
ಬೆತ್ತಲು ಗುರುತು ಸಿಕ್ಕುತ್ತಿಲ್ಲ
ಇದಾವ ಗರ್ಭ!

ನಿನ್ನ ಕಾಯುತ್ತಾ
ಮೋಕ್ಷಕ್ಕೆ ಹವಣಿಸುತ್ತಾ
ಹಪಹಪಿಸುತ್ತಾ ..
ತೊಗಲು ಕೂಡ ಹರಿಯುತ್ತಿದೆ
ದಾರಿ ಮುಚ್ಚಿಕೊಳ್ಳುತ್ತಿದೆ
ಉಸಿರು ಕಟ್ಟುತ್ತಿದೆ.. ಸಂಜೆಸೂರ್ಯ
ಹೊರಟುಬಿಟ್ಟ.. ನೀ ಬರುತ್ತಿಯೇನು?!