ಶ್ರುತಿಕವೆಯ ಬಡಿದ ಸದ್ದು

ಅಂತೂ ಜ್ವರದ ಚಕ್ರ ತಿರುಗಿ
ಹೊಕ್ಕುಳು ಹೊಕ್ಕಿತು
ಕಣ್ಣು ಕಮಲ
ಕಿವಿ ಕಣಗಿಲೆ
ಮೂಗು ಸಂಪಿಗೆ
ಕೆಂಪಾಗಿ ಅರಳುತ್ತಿವೆ..

ಭ್ರೂಕುಟಿಯಲ್ಲಿ ಸಹಸ್ರಾರದ ಬಿಂದು
ಬೊಗಸೆ ತುಂಬಾ ಚಂದ್ರಜಲ.
ಆವಾಹಿಸುತ್ತೇನೆ
ಅವರೋಹಿಸುತ್ತೇನೆ
ನಿನ್ನೊಡಲ ತಾಪವನ್ನು
ಹಾಗೆ ಸಡಿಲವಾಗು
ಬೀಜಾಕ್ಷರಗಳು ಜೀವಕೋಶಗಳ
ಹೊಕ್ಕಲಿ
ಉರಿಯ ಬಿಸಿ ಆರಲಿ

ಬೆಳಗು ಸುರಿವ ಮಂಜಿನಂತೆ
ಬೈಗು ಬೀಸೋ ಗಾಳಿಯಂತೆ
ನೀ ತಂಪಾಗು
ನೀ ಕಂಪಾಗು

ಶ್ರುತಿಕವೆಯ ಬಡಿದ ಸದ್ದು....