ಗಾಳಿ ಕದ್ದ ಸುಗಂಧ

ಬೇಸಗೆಯ ಮುಗಿಲು ಅದೆಷ್ಟು
ನಿಗಿನಿಗಿಯುವ ನೀಲಿ ನೀಲಿ
ಇಳಿದಷ್ಟೂ ಆಳಕ್ಕೆ
ಇಳಿಯುತ್ತಲೇ ಇದೆ
ಕಾಣುತ್ತ ಕಂಡಷ್ಟೂ ಕೆರಳಿಸುತ್ತಾ
ಕರೆದೊಯ್ಯುತ್ತಲೇ ಇದೆ
ಅವಳ ಕಣ್ಣುಗಳ ಒಳಗೆ ಅವಿತ
ಅಸಂಗತ ಸುರುಳಿ ಸಾಕ್ಷ್ಯಗಳಂತೆ!

ಬೆವರುವ ಮೈಗೆ
ಟೆರೇಸಿನ ತಣ್ಣನೆಯ ಗಾಳಿ ಸೋಂಕಿ
ಪುಳಕಿಸುತ್ತದೆ
ಅವಳೋ ಕಾರ್ಮೊಡದಂತೆ ಕವಿದು
ಆವರಿಸಿ ಬಿಡುತ್ತಾಳೆ
ಬೆಳಕು ಹರಿದರೂ ಬಿದ್ದ ಮಳೆ, ಆಲಿಕಲ್ಲು
ಕೊಚ್ಚಿಹೋದ ತೆವರಿಯ ಬದು
ಗಮನಕ್ಕೇಬಾರದು.

ವಿಚಾರವಿಷ್ಟೇ
ಕಾಡುಮಲ್ಲಿಗೆ ದಳ ಬಿರಿದ ಸುಗಂಧ
ಗಾಳಿ ಕದ್ದೊಯ್ದಿದೆ!