ನನ್ನ ದೇವರನ್ನು ಹೊರಗೆ
ಮನೆಯ ಹೊರಗೆ
ಭದ್ರಗೊಳಿಸಿದ್ದೇನೆ ಪುಟ್ಟ ಗುಡಿ ಕಟ್ಟಿ
ಇವಳು ನಗುತ್ತಾಳೆ..
'ನನ್ನ ಮೂರು ದಿನಕ್ಕೆ ಹೆದರಿ
ದೇವರನ್ನು ಹೊರಗಿಟ್ಟ
ನೀನಾವ ಭಕ್ತನೋ ಪೋಕರಿ'
ಎಂದು ಉರುಳಾಡಿ ನಗುತ್ತಾಳೆ
ಅದೇ ಪ್ರತಿ ತಿಂಗಳು
ಹೊರಗೆ ಕೂರುವ ಮೂರೂ ದಿನ.
ಅವಳಿಗೇನು ಗೊತ್ತು
ಆ ನಗುವಿನಲ್ಲೇ ನನ್ನ ದೇವರು
ಪ್ರತ್ಯಕ್ಷನಾಗೋದು ಅಂತ!
ತಿಂಗಳ ಪೂಜೆಗೆ ಅವನು
ದಕ್ಕೋದು ಮೂರು ದಿನ ಮಾತ್ರ!!
ಅದಕ್ಕೆ ಈ ಏಕಾಂತ ಸೇವೆ.
ಅವಾಗಷ್ಟೇ ಅವಳು ಮಗು
ನಾನು ಮಹಾತಾಯಿ..
ಮಗುವಿಗಿಂತಲೂ ಮುಗ್ಧವಾಗಿ
ಅಪ್ಪಿ ಮಲಗುತ್ತಾಳೆ, ನೋವು
ಹೇಳುವ ನಾಲಗೆ ಮಾತು
ಮರೆತು ಮಲಗಿರುತ್ತದೆ.
ಆವಾಗ ದೇವರು ಕೂಡ
ನನ್ನೊಡನೆ ಲಾಲಿ ಹಾಡುತ್ತಾನೆ
ಗುಡಿಯಿಂದ ಮನೆಗೆ ಬಂದು..
ತಿಂಗಳಲಿ ಮೂರು ದಿನ ಮಾತ್ರ
~ ಆರ್.ಪಿ. >> ಪೀರಿಯಡ್ ಮಿಕ್ಸ್ (2)
No comments:
Post a Comment