ಹೂ ಗೊಂಚಲು :
ವರುಷಗಳ ತರುವಾಯ
ಹಳೆಯ ಪುಸ್ತಕದಿ
ಸಿಕ್ಕಿದ ನವಿಲುಗರಿ..
ಎದೆಯೊಳಗೆ ಹಾಗೆ ಕಾಪಿಟ್ಟುಕೊಂಡಿದ್ದೇನೆ,
ಹೊಸ ಪುಸ್ತಕದಲಿ ಅವಳ ಹೆಸರಿಲ್ಲ !

**********


ರಾತ್ರಿಯೆಲ್ಲಾ
ಕೂಡುತ್ತಾ ಕಳೆಯುತ್ತಾ
ಮತ್ತೆ ಮತ್ತೆ ಎಣಿಸುತ್ತ ಮುತ್ತಾ..
ಏರಿಳಿಯುತ್ತಾ
ಬೆಳಗಾಯಿತು ಎಂದಳು ..
'ಹೋ ಬಜೆಟ್ ಎಷ್ಟಾಯಿತು ' ಎಂದೆ
' ಗ್ರೀಷ್ಮಕ್ಕೆ ನಾವು ಮೂರು
ಸಂಜೆಗೆ ಮತ್ತೆ ಎಣಿಸುವ ' ನಾಚುತ್ತಾ
ಸ್ನಾನದ ಮನೆ ಹೊಕ್ಕಳು.

********************

'ನನ್ನ ಸುತ್ತ ಅದೆಷ್ಟೋ
ಬಣ್ಣದ ಗಾಳಿಪಟಗಳು ಗಿರಕಿ ಹೊಡೆಯುತ್ತಲೇ ಇವೆ
ನಿನ್ನಂಥಾ ಚಂದಿರನ ಮೀರಿಸಬಹುವೆ ...'
ಉಸಿರ ಹೀರುವ ಮುನ್ನ ಪಿಸುಗುಟ್ಟಿದಳು.
ಬೆಟ್ಟದಲಿ ಹೂಗಳಿಗೆ ಲೆಕ್ಕವೇ??
ಕಾಡು ಸಂಪಿಗೆ ಸಾಕು .. ನೆತ್ತಿಯ ಮತ್ತಿಗೆ !
ಗುನುಗಿದೆ ಕಿವಿಯೊಳಗೆ
ಅವಳು ಆಲಾಪಿಸುವ ಹೊತ್ತಿಗೆ!!

*******************

ಗಾಳಿಗೆ
ತೂರಿ ತೂರಿ ಮುಂಬರುವ
ಆ ಮುಂಗುರಳನ್ನು ಕಂಡರೆ
ಏನೋ ಅಸಾಧ್ಯ ಅಸೂಯೆ.
ಹಗಲಿರುಳೆನ್ನದೆ ಅವಳ
ಕೆನ್ನೆ ತಾಗಿ ಚುಂಬಿಸುತ್ತಿರುತ್ತವೆ.

******************

 ಕನಸಿನ ಬೇಟೆ
ಸದ್ಯಕ್ಕೆ ಮುಗಿಯುತ್ತಿಲ್ಲ ..
ಏಳು ಸಾಗರ ದಾಟಿ
ಏಳು ಸುತ್ತಿನ ಕೋಟೆ
ಅಲ್ಲಿ, ಅವಳಿಲ್ಲ!
ಇಲ್ಲಿ
ಏಳು ಸುತ್ತಿನ ಮಲ್ಲಿಗೆ
ಹಾಸಿಗೆ ತುಂಬೆಲ್ಲಾ ಅರಳಿ
ಘಂ ಘಮಾ ಘಮಾ ..
ಹಿಡಿಯಲು ಮನಸು
ಅಪ್ಪಲು ಅಳುಕು..
ಮಾಗಿಯ ಮುಂಜಾವು
ಬಿಸಿಲಿನ್ನೂ ಅವಳ ಮುಟ್ಟಿಲ್ಲ...
*****************

ಗಾಢ ಮೌನ ಕಣ್ಣ ಬಿಗಿದಿರಲು
ಕಂಠ ಉಲಿಯುದೆಂತು
ನಿನ್ನೊಲವಿನ ಪ್ರೇಮ ಗೀತೆಯಾ ??

******************

ಪ್ರಾಣ ಹಾರುವ ಮುನ್ನ
ಒಲವಿನ ಆತ್ಮಹತ್ಯೆಯಾಗಿತ್ತು !!

****************

ನಿನ್ನ ಮೌನಕೆ
ನನ್ನ ಅರಿವು-ಅಹಮ್ಮುಗಳು
ತಲೆದೂಗಿದವು.

*********

ಪ್ರೀತಿಯನ್ನು ಎದೆಯಲ್ಲಿ
ಇಟ್ಟುಕೊಳ್ಳಬಾರದು!!
ಇರಿದು ಹೊರ ನಡೆವಾಗ
ಉಸಿರೇ ಇರುವುದಿಲ್ಲ ಕೇಳಲು ಕಾರಣ !!

*************