ಬೆಬ್ಬನೆ ಬೆರೆವವರ ಕೇಡು

ಬೆಬ್ಬನೆ ಬೆರೆವವರ ಕೇಡು
**************
ಭ್ರಮೆ ಕಟ್ಟಿದ ಮೋಡಗಳು
ಬೆಟ್ಟವ ಮುಚ್ಚಿ, ಕರಗಿಸುವ
ಛಲದಲ್ಲಿ ಹನಿಯ ಚೆಲ್ಲಿದುವು.
ಅಯ್ಯಾ,
ಬೆಟ್ಟ ಜಗ್ಗಲಿಲ್ಲ..
ಬಯಲು ಕುಗ್ಗಲಿಲ್ಲ..
ನದಿ ನಿಲ್ಲಲಿಲ್ಲ..

ಅಮಾಸೆ ಕತ್ತಲಲಿ
ಧೂಮಕೇತುವಿನ ಬಾಲ
ಹಿಡಿದ ಧೂಳು ಕಸ ಕಡ್ಡಿಗಳು
ಆಗಸದಲ್ಲಿ ಮೆರೆದುವು.
ಸೂರ್ಯನ ಸೋಲಿಸಿದ
ಸ್ವರತಿಗೆ ಸಿಕ್ಕು
ಅಯ್ಯಾ,
ಬೆಳಗಾದೊಡನೆ
ಬಟ್ಟಬಯಲಾದುವು.

ನದಿಗೆ ದಾರಿಯಿಲ್ಲವೆಂದು
ಅಣಕಿಸಿದ ಅಡ್ಡಕಸುಬಿನ
ನಗರದ ಘಟಾರಗಳು
ಅಯ್ಯಾ,
ಎಲ್ಲ ಬೀದಿಗಳ ಸುತ್ತಿ
ನದಿಯ ಎದೆ ಹೊಕ್ಕಿ
ಮೋಕ್ಷ ಕಂಡುವು.

ಅಯ್ಯಾ,
ಆಚಾರವನರಿಯದೆ ವಿಭವವಳಿಯದೆ
ಕೋಪವಡಗದೆ ತಾಪ ಮುರಿಯದೆ,
ಬರಿದೆ ಭಕ್ತರಾದೆವೆಂದು ಬೆಬ್ಬನೆ ಬೆರೆವವರ ಕೇಡಿಂಗೆ
ನಾನು ಮರುಗುವೆನು ಕಾಣಾ ಗುಹೇಶ್ವರಾ.