ಷಡ್ಜದ ದನಿ

ನೀನು ಕಣ್ಣಿನಲ್ಲಿ
ಮೀಟಿದಷ್ಟು ನೋವು ದಾಟಿ
ನಾದವಾಗುತ್ತೇನೆ.
ಏದುಸಿರಿನ ಎದೆಯ ಕೊಳಲು
ನುಡಿಯುತ್ತದೆ ನಿನ್ನೇ ಮನದನ್ನೆ.
ಈ ಶಬ್ದತೀರದಲಿ
ಅದೆಷ್ಟು ರಾಗಗಳು!
ಅದೆಷ್ಟು ಅಲೆಗಳು!
ಅದೆಷ್ಟು ವಾಂಛೆ!!

ಕಾಯುತ್ತಿವೆ ನರನಾಡಿಗಳು
ಹುರಿಗೊಂಡು ನಿನ್ನ ಬೆರಳಿಗೆ
ಸಿಕ್ಕು ಮೋಕ್ಷ ಹೊಂದಲು.
ಶ್ರಾವಣದ ಸಂಜೆರಂಗು
ನಿನ್ನದೊಂದು ಆಲಾಪ
ಸಾಕು ಸಾಕು ..
ಅಷ್ಟು ಸಾಕು
ಸ್ವರಗಳು ಚಿತ್ರಗೊಂಡು
ಮುಗಿಲಕಡಲಿನ ತೇಲಲು
ನಾ ನಿನ್ನ ಅಭಿಮಾನಿ.

ಅದೋ ಷಡ್ಜದ ದನಿ
ಕೇಳಿಬರುತ್ತಿದೆ....

~ ಆರ್.ಪಿ.