ಹಸಿರು ಟೀ ಘಮಲು

'ಮಲಗುವ ಮುನ್ನ
ಕವಿತೆ ಓದಬೇಕು' ಅಪ್ಪಣೆ ಕೊಡಿಸಿದಳು
ಕೊಡಗಿನ ಗೌಡತಿ
ಕೊರಿಯಾದ ಹಸಿರು ಟೀ ಪುಡಿ
ಹಿಡಿದು ಅತ್ತ ಹರಿದಳು.
ಕುದಿಸುತ್ತಾ ಅದೇನೋ ಹಾಡುತ್ತಾ
ಆಗಾಗ್ಗೆ ನನ್ನತ್ತ ಇಣುಕಿದಳು,
ನಕ್ಕಳು ಮಾಟಗಾತಿ.

ಪರಿಕರಕ್ಕೆ ಪರಿತಪಿಸುವಾಗ
ಅವಳು ಕಳಚಿಟ್ಟ ಮೂಗುತಿ,
ಮುತ್ತಿನ ಓಲೆ, ಬೆಳ್ಳಿಯ ಕಾಲಂದಿಗೆ
ಟೈಟಾನ್ ವಾಚು..
ಅರೆ! ವ್ಯಾನಿಟಿ ಬ್ಯಾಗಿನಲ್ಲಿ
ಘಮಗುಡುವ ಕಾಂಡೋಮ್ಮು
ಅರೆರೆ! ಈಗ ನೆನಪಾತು
ನಾನು ಹೊತ್ತು ತಂದ
ಎರಡು ಪಲ್ಲಕ್ಕಿ ಮಲ್ಲಿಗೆ ಕಾರ್ ಶೆಡ್ ನಲ್ಲೇ
ಉಳಿದು ಹೋಗಿದೆ.

ಎರಡು ಪಿಂಗಾಣಿ ಬಟ್ಟಲು
ತುಂಬಿ ಬಂದುವು.
ಟೀ ಹೀರುತ್ತಾ ಹೀರುತ್ತಾ
ಇಬ್ಬರ ಮೈ ಮೇಲೆ
ಕವಿತೆಗಳು ಕಂಡುವು
ಓದುತ್ತಾ ಹೇಳುತ್ತಾ
ಒಳಕೋಣೆಯಿಂದ ಹಜಾರಕ್ಕೆ
ಇರುಳ ಕವಿಗೋಷ್ಠಿ ಸಂಪನ್ನ.

ಮುಂಜಾನೆ ಮತ್ತೆ ಹಸಿರು ಟೀ
ಕುದಿಯುತ್ತಿದೆ...
ಇಲ್ಲೆನೋ ಘಮಲು!