ಇವತ್ತು ರಜೆ ಹಾಕಿದ್ದೀವಿ

       ಬೆಳಗು ಇಬ್ಬನಿ ಅರಳುವ
ಹೊತ್ತಿಗೆ..
ಇವಳ ಮುಡಿ ಬಿಚ್ಚಿದ ಘಮಲಿನ
ಉನ್ಮತ್ತ ತಾವರೆಯ ಮೋರೆಯಲ್ಲಿ
ದುಂಬಿಯೊಂದು ಕುಳಿತು
ಬೆಚ್ಚನೆಯ ಕಾಫಿ ಹೀರುತ್ತಾ
ಕಚ್ಚಿದ ಚಾಕಲೇಟಿನ ಸಿಹಿ ಅಂಟು
ಗಲ್ಲವ ಸವರುತ್ತಾ ಸಾಗುತ್ತಿದೆ
ಎದೆ ತಪ್ಪಲಿಗೆ.

ಅಲಾರಮ್ಮು ಬಾಯಿ ಬಡಿಯುತ್ತಿದೆ
ಮತ್ತಿಲ್ಲಿ ಮೊಬೈಲು
ಹೊರಗಲ್ಲಿ ಟ್ರಿಣ್ ಟ್ರಿಣ್ ಹಾಲಿನವನ ಸೈಕಲ್ಲು
ಟಿವಿಯಲ್ಲಿ ದಿನಭವಿಷ್ಯದ ಡುಮ್ಮಣ್ಣ
ಮಧ್ಯೆ ಮಧ್ಯೆ ಟ್ರಾಫಿಕ್ ಜಾಮು
'ಇವತ್ತು ರಜೆ... ರಜೆ ಹಾಕಿದ್ದೀವಿ'
ಪಿಸುಗುಟ್ಟಿಕೊಂಡೆವು.. ನಗುನಗುತ್ತಾ

ಕುಟ್ಟಿ ಪುಡಿ ಮಾಡಿದ MTR ಮಸಾಲೆ
ಸಣ್ಣಗೆ ಹಚ್ಚಿದ ಕಾಯಿಪಲ್ಲೆ
ಕುಕ್ಕರ್ ಆಗಾಗ ಏದುಸಿರುಬಿಡುತ್ತಾ
ಮೂರ್ನಾಲ್ಕು ಶಿಳ್ಳೆ ಹಾಕಿ ಬಿಟ್ಟಿದೆ!

ಇದೀಗ ಟೀ ಸಮಯ
ಸೊಪ್ಪು ಹದವಾಗಿ ಬೇಯುತ್ತಿದೆ
ಬಣ್ಣ ಬಿಡುತ್ತಾ
ಅಷ್ಟು ಸಕ್ಕರೆಯ ಅರಳು
ಪಾವು ಅಳತೆಯ ಹಾಲು
ಕುದಿ ಬರುವ ಹೊತ್ತಿಗೆ..
ಬೇಸಗೆಯ ಬೆವರ ಬೆಳಕು
ಮೈಯೆಲ್ಲಾ ಹೊಳೆಯಾಗಿ ತುಂಬಿ
ಕೋಡಿ ಬಿತ್ತು!