ಕೋವಿ ಮತ್ತು ಕೊಳಲು ~ 2

ಉಸಿರ ಕೊಳವೆಯ ಒಳಗೊಂದು
ಸಣ್ಣ ಸೂಜಿಗಾತ್ರದ
ತೂತು ಬಿದ್ದು
ಬೆಳಕಿರದ ಬೆಂಕಿಯ ರವ
ಎದೆಯ ಗೂಡಿಗೆ ತಾಗಿರಲು
ರಾತ್ರಿಯ ಕನಸುಗಳು ರಚ್ಚೆ ಹಿಡಿದು
ಕೊಳಲನೂದಿಸಿ
ಕಣ್ಣುಗಳ ತೂಗುಯ್ಯಾಲೆಯಲಿ
ನಿದ್ದೆಗೆ ಬಿದ್ದುವು.

ಕರ್ನಲನು ಹಿಡಿದ ಕೋವಿಗೆ ಬೆಚ್ಚಿದಂತೆ
ಧೋ ಸುರಿವ ಮಳೆಯಲ್ಲಿ
ಮತ್ತೆ ಮತ್ತೆ ಬೆಂಕಿಯ ಅರಸುತ್ತಾ
ಎದೆಗೆ ಕೈ ಇಡಲು
ಹಸಿಹಸಿ ಕೆಂಡ ಸಿಕ್ಕು
ನಿದ್ದೆಯ ಒದ್ದೆ ಕಣ್ಣುಗಳು
ಕತ್ತಲಲಿ ತಡವರಿಸುತ್ತಾ
ಮಡಿಲ ತುಂಬಾ ಕೆಂಡವ ತುಂಬಿಕೊಳ್ಳಲು

ಉಸಿರೂ ಕಿಡಿಯೂ
ಸೇರಿ ಹೊತ್ತಿ ಉರಿಯುತ್ತಿದೆ
ನೋಡಿದೀರಾ ..
ಆಕಾಶದ ತುಂಬೆಲ್ಲಾ
ಮಡಿಲ ಕೆಂಡ ಉರಿಯುತ್ತಿದೆ ನೋಡೀದಿರ?!